प्रशासक | २०८३ आषाढ़ ८ गते १८:५५ मा प्रकाशित

कैलाली डेस्क
लम्की, असार ८

नेकपा (एमाले) का उपाध्यक्ष तथा पूर्वअर्थमन्त्री विष्णु पौडेल पक्राउ परेका छन् । गृह मन्त्रालय स्रोतका अनुसार सम्पत्ति शुद्धीकरणसम्बन्धी अनुसन्धानका क्रममा उनलाई सोमबार सुर्खेतबाट पक्राउ गरिएको हो ।

सम्पत्ति शुद्धीकरण अनुसन्धान विभागले पौडेलमाथि अनुसन्धान अघि बढाइरहेको थियो । विभागको अनुरोधमा नेपाल प्रहरीले उनलाई नियन्त्रणमा लिएको जनाएको छ।

कर्णाली प्रदेश प्रहरी कार्यालयका डीआईजी जयराज रापकोटाका अनुसार पौडेललाई हाल जिल्ला प्रहरी कार्यालय सुर्खेतमा राखिएको छ । उनलाई थप अनुसन्धानका लागि काठमाडौं ल्याउने तयारी भइरहेको छ ।

प्रहरीका अनुसार पौडेललाई स्थलमार्गबाट वा सुर्खेतबाट नेपालगन्ज पुर्‍याई त्यहाँबाट हवाईमार्ग हुँदै काठमाडौं ल्याउने विषयमा सुरक्षा अधिकारीहरूबीच छलफल भइरहेको छ ।

एमालेको आन्तरिक चुनावी समीक्षा तथा संगठन पुनर्गठन कार्यक्रमका लागि पौडेल आइतबार सुर्खेत पुगेका थिए ।