प्रशासक | २०८३ बैसाख २९ गते १९:२० मा प्रकाशित

अक्षर साथी लम्की, बैशाख २९

कैलालीको लम्कीचुहा अस्पताललाई प्रादेशिक अस्पताल बनाउने निर्णय कार्यान्वयन गर्न लम्कीचुहा प्रादेशिक अस्पताल विकास समितिका अध्यक्ष रामबहादुर विष्टले कानुनी बाटो अविलम्ब लिने बताएका छन्।

मंगलबार लम्कीमा आयोजित पत्रकार सम्मेलनमा अध्यक्ष विष्टले भने, “नगरपालिकाले नै सिफारिस गरेको आधारमा संघीय सरकारको निर्णयबाट प्रदेश सरकार मातहत आएको यो अस्पताललाई प्रादेशिक अस्पतालका रूपमा विकास गर्न मौजुदा कानुनबमोजिम विकास समिति गठन गरिएको थियो। यो विषय सर्वोच्च अदालतमा पुगेको थियो। अदालतले अन्तरिम आदेश नदिई मार्गप्रशस्त गरेको अवस्थामा पनि बाधा अड्काउ भइरहेको छ। त्यसैले अब कानुनी प्रक्रिया अविलम्ब अघि बढाइने छ।”

अध्यक्ष विष्टले प्रदेश सरकारले लम्कीचुहा नगरपालिकासँग छलफल नै नगरेको नगरप्रमुख सुशिला शाहीको दाबीलाई समेत अस्वीकार गरे। उनले प्रदेश सरकारको सम्बन्धित मन्त्रालयले विभिन्न मितिमा बारम्बार पत्र पठाएको जानकारी दिए। उनले वर्तमान अस्पताल विकास समिति छलफल गर्न सधैं तयार रहेको पनि बताए।