प्रशासक | २०८२ फाल्गुन २९ गते १४:१० मा प्रकाशित

अक्षर साथी
लम्की, फागुन ३०
  सुर्खेतकी १६ वर्षीया बालिका इनिसा बि.क.का लागि न्यायको माग गर्दै कैलालीको बौनियामा खबरदारी र्याली निकालिएको छ। शुक्रबार आयोजित उक्त र्यालीमा विद्यार्थी, अधिकारकर्मी तथा स्थानीय नागरिकहरूको सहभागिता रहेको थियो ।
  र्यालीमा ‘बलात्कारी तथा हत्यारालाई कडा कारबाही गर’, ‘हत्या र हिंसा बन्द गर’, ‘नारीलाई सुरक्षित बनाऊ’ जस्ता नाराहरू लगाउँदै न्यायको माग गरेका थिए ।
  आयोजक संस्था जुनकिरी नेपालकी अध्यक्ष अपेक्षा रोकायले बलात्कारपछि हत्या गरिएका निर्मला पन्त, भागीरथी भट्ट, माया बि.क. तथा हालै सुर्खेतकी इनिसा बि.क. जस्ता घटनामा पीडितले न्याय पाउन नसकेको अवस्थाप्रति सचेत गराउन र न्याय सुनिश्चित गर्न दबाब सिर्जना गर्ने उद्देश्यले खबरदारी र्याली आयोजना गरिएको बताइन् ।
  अध्यक्ष रोकायले पीडितका लागि न्याय सुनिश्चित नभए थप सशक्त आन्दोलन गर्न पनि पछि नहट्ने चेतावनी पनि दिइन् । साथै, उनले यस्ता घटनामा दोषीलाई कानुनी दायरामा ल्याई कडा कारबाही गरिनुपर्नेमा जोड दिइन् ।
  प्रहरी अनुसार फागुन २३ गते बिहान ट्युसन पढ्न घरबाट निस्केकी इनिसा त्यसपछि सम्पर्कविहीन भएकी थिइन् । पछि सहिद पार्क नजिकैको जंगल क्षेत्रमा गम्भीर अवस्थामा भेटिएकी उनलाई  उपचारका लागि अस्पताल पु¥याइए पनि बचाउन सकिएको थिएन ।
घटनापछि प्रहरीले एक किशोरसहित चार जनालाई नियन्त्रणमा लिएर घटनाबारे थप अनुसन्धान गरिरहेको जनाएको छ ।