प्रशासक | २०८२ माघ १७ गते १४:०४ मा प्रकाशित

कैलाली डेस्क
लम्की, माघ १६
नेकपा एमालेले आफ्नो चुनावी अभियानलाई वडास्तरसम्म विस्तार गर्ने क्रममा कैलाली निर्वाचन क्षेत्र नं. २ अन्तर्गत लम्कीचुहा नगरपालिका–२ मा सम्पर्क कार्यालय स्थापना गरेको छ । मोतिपुर इलाका प्रहरी कार्यालय नजिकै एमाले वडा नं. २ को सम्पर्क कार्यालयको औपचारिक उद्घाटन गरिएको हो ।
सम्पर्क कार्यालय उद्घाटन कार्यक्रममा प्रतिनिधिसभा कैलाली क्षेत्र नं. २ का उम्मेदवार सुर्यबहादुर थापाले पार्टीको नीति, कार्यक्रम र विकासप्रति जनताको विश्वास बढ्दो रहेको उल्लेख गर्दै आगामी निर्वाचनमा एमालेको विजयी सुनिश्चित रहेको दाबी गरे ।
कार्यक्रममा पार्टीका नेता महादेव बजगाई, बखतबहादुर बिष्ट, क्षेत्रीय संयोजक धनञ्जय न्यौपाने, पूर्व कैलाली सचिव डेजी पाण्डे, नगर अध्यक्ष शेरबहादुर बिष्ट तथा लम्कीचुहा नगरपालिका वडा नं. २ का अध्यक्ष सन्तोष कुमार ओलीलगायतले शुभकामना मन्तव्य राख्दै पार्टीको संगठन सुदृढीकरण र जनसम्पर्क विस्तारमा सम्पर्क कार्यालय महत्वपूर्ण हुने बताएका थिए ।
वडा निर्वाचन परिचालन समितिका संयोजक  दलबहादुर बिष्टको अध्यक्षतामा सम्पन्न कार्यक्रमको सञ्चालन वडा परिचालन समितिका सचिव  टिकाराम बजगाईले गरेका थिए ।
कार्यक्रममा वडा नं. २ का नेताकार्यकर्ता तथा समर्थकहरूको उल्लेखनीय उपस्थिति रहेको थियो ।